نشيد الطبيب الشحاذ

من ذوات الأبيض
تتعب تمرض تسخن تبرد .. أنا موجود
بس تجود بالموجود
يعمر بيتك و يخليك .. تيجى لعندى و أنا أفليك
بس تبحبح إيدك حبة .. أصل الإسم إحنا أطبة
حاجة كبيرة و فوق فى العالى .. بس الجيب و حياتك خالى
و أعمل إيه أنا عايز أتجوز .. بأضحك و أنا جوايا مبوز
موش بالذمة كان أحسن لى .. أطلع حتة واد بيغنى
موش دكتور لابس سماعة .. أسمع ولا حد بيسمعنى
ولا أرّقص كورة فى ملعب .. ياه فى الجون لا أسهر ولا أتعب
سِوى مغلوب أو أغلط و أغلب .. فى الحالتين أنا دايما بأكسب
ولا أتاجر فى موبايلات ..ولا أصلح عربيات
ديك الليلة .. جاتلى وظيفة جوه مكان . . أشبه بحظيرة حيوان
كان مستوصف بعلاج شعبى .. فوتهولى واحد صاحبى
قلت هأعُك و هأعمل إيه .. كانت الليلة بعشرة جنيه
يوم و التانى عدوا عليا .. دخل الحاج فتيحة عليا
قال لى وشك حلو عليا .. والغلة قلت فى إيديا
الليلة هتنزل للنص ..همه خمسة جنيه و بس
أنا كده و ما فيش غير كده عندى ما فيش حل تانى
لو عاجبك عاجبك موش عاجبك ما تسيبنى فى حالى
ياه و الله ده راجل طيب .. سبته فى حاله
و من ساعتها و جيبى حاله .. يصعب على أى حد حاله
حاجة تضحك حاجة تبّكى موش مهم
لكن أرجع و أقول تانى .. يالا أهو كله عمل إنسانى
مهما العالم كله نسانى
بكره هأقب .. هوب و هأصعد
و أفرح بقه بالبلطو الأبيض
و ساعتها من عينى لو تمرض .. بالمجان.. لا هتدفع لا أسود ولا أبيض